آه ياوطن ..

 

عشش عليه العنكبوت

 

أولادك اللى بينهشوا عرضك علن

بيهتفوا بإسم الطاغوت

ماسكين ف ايدهم جهلهم

والتانية مفتاح التابوت

*** *** ***

سلّم عليّا يا ولد

قبل امّا تلبس بدلتك

حطوا على كتافك كفن

والليلة هتكون زفّتك

اكتب تاريخك يا وطن

وبدمى لوِّن ثورتك

البيعة لحساب الكلاب

أمّا التمن .. كان ضحكتك

*** *** ***

أنا شفت دمك لطخوا بيه الحيطان

ليه علموك الموت شهيد

وبالخيانة ..عكروا بيك الميدان

مين اللى باعك يا ضنايا

جاه وكرسى؟

واللا مرسال الشيطان ؟

حزنى على ابنى اللى راح

واللا على ابنى اللى خان

*** *** ***

آه يا ولد ..

حطوا على كتافك سلاح

و ف لحظة دمك فرقوه

مابين ديابة ...

وبين كلاب اتعلمت معنى النباح

أبكى عليك واللا أزغرد

لليمامة اللى بروحك ف السما

فاردة الجناح

ياربى اشكو بلوتى

على إيد ولادى ..

عرضى ليه أصبح مُباح

29/01/2013